የአቶ ብሩክ ማሞ አጭር የሕይወት ታሪክ

በወ/ሮ እናኑ ጌታሁን የቀረበ

ወንድማችን አቶ ብሩክ ማሞ ወይም በክርስትና ስሙ ተክለ አረጋዊ ሰኔ 6 ቀን 1955 ዓ.ም በአዲስ አበባ ከተማ ተወለደ። በአዲስ አበባ ቢወለድም የወጣትነት እድሜዉንና ትምህርቱን የተከታትለው በቀደሞ ስሙ በጅባትና ሜጫ አውራጃ በአምቦ ክተማ ነዉ።

እንደማንኛውም ህጻን በዚያን ዘመን በቄስ ት/ቤ ፊደል ቆጥሮ የአንደኛ ደረጃ ትምህርቱን በአምቦ ት/ቤት በጥሩ ሁኔታ ስላጠናቀቀ፣ የ2ተኛ ደረጃ ትምህርቱን በአዲሰ አበባ ጄኔራል ዊንጌት አዳሪ ት/ቤት ለመማር እድል አገኝቶ ለ4 ዓመታት ትምህርቱን ተከታትሏል። በጥሩ ውጤትም አጠናቋል።  

ብሩክ የማትሪክን ፈተና 4 A ና 4 B በማምጣት ከግርማዊ ጃንሆይ እጅ በስማቸው የታተመ ን.ነ.ቀ.ኃ.ሥ የሚል ሜዳልያ ለመሸለም በቀቷል።  

ቀጣይ ትምህርቱንም በዘመኑ ዝነኛ ወደነበረው የኢትዮጵያ አየር ኃይል በመቀላቀል ተከታትሎ በጥሩ ውጤት በማጠናቀቁ፣ በእጩ መኮንንነት ደረጃ ሲመረቅ በጊዜው ከነበሩት መሪ ፕሬዜዳንት ጄኔራል ተፈሪ በንቲ እጅ ሽልማት ለመቀበል በቅቷል።

ከዚያም ለከፍተኛ ትምህርት ወደ ቀድሞው ዮጎዝላቪያ ተልኳል። እጩ መኮንን ብሩክ ወደ አውሮፓ የመጣበት ጊዜ ክረምት ስለነበር ለመጀመሪያ ጊዜ የአውሮፓን ብርድና የበረዶ ክምር የተጋፈጠበት ጊዜ እንደነበር በየአጋጣሚው ሲናገር ይደመጥ ነበር።

በትምህርት ላይ እንዳለም በወቅቱ ተማሪው የሃገሩን እጣ ፋንታ በንቃትና በመደራጅት የሚሳተፍበት ዘመን ነበረና የፖለቲካ ትግሉን ተቀላቀሎ ተሳትፎውን ቀጠለ። ብሩክ በፖሎቲካ አቋሙ ፍጹም የማይደራደር፣ በግልጽና በድፍረት አብረውት ከነበሩት ከደርግ ከፍተኛ መኮንኖችና ባለስልጣናቶችም ጋር በዲሞክራሲያዊ መብቶች ላይ በግንባር የሚፋለም ነበር።

ተራማጁ ኃይል እርስበርሱና በኋላም ሙሉ በሙሉ በደርግ የተመታበት ወቅት ነበርና ውጭ ሀገር በትምህርት ላይ የነበሩና በአቋማቸው የፀኑ ተማሪዎች፣ መንግሥት በሚያደርገው ተፅዕኖ ምክንያት ትምህርታቸዉን ሳያጠናቅቁ ወደ ኢትዮጵያ እየተጠሩና ችግር ዉሰጥ እየገቡ ነበር። በዚህም ምክንያት ብዙዎች ከትምህርት ገበታቸው በመነሳት ወደ 3ኛ ሃገር ለስደት ተዳርገዋል። ብሩክም እነደዚሁ ወደ ጀርመን ለመሰደድ ተገደደ። 

በስደት በነበረበት ጊዜም ቢሆን ለሀገሩና ለወገኑ እንቅልፍ አልነበረውም። የኢትዮጵያውያን ኮሚኒቲ ሙኒክን በቀድሞ ስሙ የኢትዮጵያውያን መረዳጃ ማህበር በሙኒክ፣ እንዲቋቋም አሻራውን አስፍሯል፣ በአመራር አካልም ውስጥ ተሳትፏል። በቅንጅት ደጋፊ ድርጅትም ውስጥ እንደዚሁ።

ብሩክ አንደበተ ርቱዕ ተናጋሪ፣ ጨዋነት ሁልጊዜ የማይለየው የውይይት ሰው ነበር። አንባቢና ሰፊ የእውቀት አድማስም ነበረው። 

በመራራውና እልህ አሰጨራሹ የዲሞክራሲና የፍትህ ትግል ዉስጥ በECADF Current Affairs ቤት ውስጥ ትልቅ አስተዋፅዖ ነበረው። ቤቱን ከመቆርቆር ጀምሮ ትግሉን መልክ ከሚያሲዙ አንጋፋ አድሚን መካከል የነበረና Hizeb Balew በሚል ስምም የሚታወቅ ነበር።  

ፍቅር በተላበሰ ግሳፄ እየተቆጣ፣ ሀገር መውደድ ምን እንደሆነ ለተረካቢው ትውልድ ያስተምር እንደነበረ፣

ወጣቱን ትውልድ ስለ ሀገሩ ታሪክ እንዲያዉቅና ጥሩ ግንዛቤ እንዲኖረው፣ መፅሐፍትን እያነበበ ጭምር ትውልድን የሚያስተምርና የሚቀርፅ ብርቱ መምህር እንደንበረ ሰሞኑን የምናነባቸዉ መልእክቶች ይመሰከራሉ።

ከለውጡ ወዲህ፣ ካለፈው ሁለት አመት ጀምሮ በውጪ የሚኖሩ ተቃዎሚ ወገኖች ወደ ሃገራቸው በሚገቡበት ጊዜ እሱም ከሀገር ከወጣ በ45 ዓመቱ ለመጀመሪያ ጊዜ ወደ ትውልድ ሀገሩ ለመሄድ በቀቷል።

አሁንም ለእረፍት ወደ ኢትዮጵያ በሄደበት ጊዜ በአደረበት ድንገተኛ ህመም ነው ከዚህ ዓለም በሞት የተለየን!

ስርዐት ቀብሩም ባለፈው ሳምንት Nov 8/2020 ወይም በኢትዮጵያ ጥቅምት 29 /2013 ውድ ቤተሰቦቹ በሚኖሩበትና የወጣትነት እድሜውን ባሳለፈበት በአንቦ ከተማ በደብረ ብርሃን እየሱስ ቤ/ክርስትያን ውስጥ ተፈፅሟል።

የወንድማችን ብሩክ ማሞ ህልፈት ድንገተኛ ቢሆንም ነገን ሳይጠብቅ፣ ደከመኝ ልረፍ ሳይል፣ በአመነበት አስተሳሰብና በነበረው አቅምና ችሎታ ያለውን የሰጠ፣ በኢትዮጵያዊ ጨዋነት የሚችለውን ሁሉ በማድረግ፣  እንደ ዜጋ የበኩሉን ያበረከተና ያለፈ ኩሩ ኢትዮጵያዊ ነው! 

ለሀገሩና ለባንዲራው የነበረው ፍቅርና ክብር ከፍተኛ ነበር! በመሆኑም እነደተመኘውና እንደናፈቀው  የመጨረሻ ሰዓቱም በሚወዳት ሀገሩና በሚወዳቸው ወገኖቹ መካከል ሆኖ የመጨረሻውን የሞት ፅዋ ቀመሰ!

ወንድማችንና ሀገር ወዳዱ ብሩክ!

ስትደክም፣ ስትባክንና ስትሮጥ ሕይወትህን አሳለፍክ፣ ዛሬ በድንገት ባልታሰበ ጊዜና ቦታ በሞት ተለየኸን!  „በዘርና በጎጥ ሕዝቡ ተከፋፍሎ ማየት ደስ አይልም፣ ቶሎ እመለሳለሁ“ እያልክ እንደቀልድ ለእረፈት እንደሄድክ ላትመለስ በዚያው ቀረህ!

የደከምክበትንና የታገልክለትን የነፃነት አየር በበቂ ሳትተነፍስ በቅፅበት ወደ ዘለዓላማዊው እረፍት በመሰናበተህ አዝነናል!

አንተ ግን ሩጫህን ጨርሰሃልና እረፍ!  

ፈጣሪ ነፍስህን በአፀደ ገነት ያኑርልን! 

ለልጁ ለመሰከረም፣ ለቤተሰቡ፣ ለወዳጅ ዘመዶቹና ጓደኞቹ፣ አንዲሁም ለሙኒክ የኢትዮጵያውያን ማሕበረሰብ በሙሉ መፅናናትን ይስጥልኝ።

November 15, 2020

---

ማስታወሻ ከኤፍሬም ገ/ጻዲቅ

ቀኑንና ሰዓቱን በትክክል በማላስታውሰው ለስደቱም ለሃገሩም ኣዲስ በነበርኩበት በመጀመሪያው አመት በኣንደኛው ቀን ያኔ አንኖርበት በነበረው መጠለያችን የሚያውቃቸውን ሰዎች ሊጎበኝ በመጣበት ወቅት ነበር ብሩክን ለመጀመሪያ ጊዜ ያየሁት።

      ከሰው ጋር ለመግባባት ብዙ የማይከብደው ብሩክ ከታናናሾቹም ጋር ቢሆን ዝቅ ብሎ ስቆና ተጫውቶና ቀልዶ ወድያው ጉዋደኛ የሚሆን ሰው ወዳድ እና ወገኑን ኣፍቃሪ እንደሆነ ለማወቅ ጊዜ ኣልወሰደብኝም።

በተለይ እኔንና እኔን መሰል በሙኒክ ከተማ ዉስጥ በቀላሉ የመኖሪያ ፈቃድ የማግኘት አድል ያልነበረን ኣአዎች በዚህ ኣገር ቀደም ብለው የመጡና ከኛ በተሻለ የሃገሩን ሁኔታ የሚገነዘቡ እንደ ብሩክ ያሉ አህትና ወድሞቻችን ከጠበቃ አስከ ፍርድ ቤት የቓንቓ ትርጉምና አርዳታ በማድረግ ልደረጉልን ወገናዊ ትብብር ምን ግዜም አናከብራጨዋለን።

   ወንድምስችን ብሩክ ኢትዮጵያውያን ወገኖቹን ለመርዳት ካደረጋቸው የተለያዩ ተግባራቶች ዉስጥ በቅርብ ልመሰክርለት የምችለውን አንኩዋን ባነሳ በሙኒክና ኣካባቢው የሚኖሩ ኢትዮጵያውያን መረዳጃ ማህበር (ኢትዮጵያውያን ኮሚኒቲ)አንዲጠናከርና ኢትዮጵያውያን ህብረትና ትብብር አንዲኖረን ያደረገው ኣስተዋጽዎ ዋነኛው ነው ።

   ሁላችንም አንደምናውቀው በሙኒክ የኢትዮጵያውያን መረዳጃ ማህበር ኣለ ሲሉት አየጠፋ ጠፋ ሲሉት አየኖረ በብዙ ዉጣውረድ ከዚህ የደረሰ ማህበር ነው ።

  በተለይ ብሩክ በስራ ኣስኪያጅ ኮሚቴ ኣባልነት የማህበሩ ጸሀፊ ሆኖ ያገለገለበት የስራ ኣመራር ኮሚቴ የማህበሩን ህልውና ማስቀጠል በተሳነው ወቅት ብሩክ ብቻውን አንደ ኣንድ ኮሚቴ በሱ በኩል ለሚመጡ ደብዳበዎች መልስ አየሰጠ በሌላ በኩል በግል የሚያውቀንን ሰዎች ማህበሩን አንድናስቀጥል አያግባባና አያበረታታ በጣም ባለቀ ሰኣት የኣባላትም ቁጥራቸው በተመናመነበት ኣስቸጋሪ ግዜ ተረካቢ ኮሚቴ በማስመረጥ ከለሎቹ የኮሚቴ ኣባላት ጋር በመተባበር የማህበሩን ህልውና ያስቀጠለ ባለውለታችን ነው።

  አኔ በቅርበት ያየሁትን መሰከርኩለት አንጂ ብሩክና ኢትዮጵያዊነት በፍጹም የማይለያዩ  የለት ከለት ክስተቶች አንደነበሩ ብሩክን የሚያውቅ ሁሉ ያውቀዋል።

 በታሪክ ኣዋቂነቱ በባንዲራ ወዳድነቱ በሰው ኣክባሪነቱና ቁምነገርኝነቱ የምናውቀው ብሩክ ዛሬ በህይወት ቢለየንም ባከናወናጨው ተግባራቱና በወንድማዊ ፍቅሩ ምን ግዜም በልባችን ይኖራል።

በመጨረሻም ኣምላክ የውንድማችንን ነፍስ በገነት ያኑርልን አያልኩ ዝክረ ብሩክ ማሞ መታሰቢያ ጦንልኝ ዘንድ ይቺን  ኣጭር ስንኝ ኣበርክቼለታለሁ።

የወንድማችንን  አቶ ብሩክ ማሞን ዜና እረፍት አስመልክቶ በሙኒክ የኢትዮጵያውያን ኮሚዩኒቲ አስተባባሪነት
በተዝጋጅው የመታሰቢያ ዝግጅት ላይ የቀረቡ  ግጥሞች።

---

---